O Pozo da Ferida

A lenda

Creo que vin demasiado Ataque aos Titáns, porque desde entón cada vez que leo a palabra "xigante" penso automaticamente no anime. Así que, cando lin a lenda do Pozo da Ferida e apareceu unha vella xigante, na miña cabeza tiña a cara de Ymir. Xa non fun capaz de imaxinala doutra maneira. Cando llo contei a Carol deulle tanta graza a comparación que agora ela tamén a ve así.

Conta a lenda que unha vella xigante ía cargando un enorme feixe de mulime ás costas cando esvarou e caeu dentro do Pozo da Ferida. Nunca máis volveu saír. Dise que, desde aquel día, a auga ten esa cor escura polo estrume que levaba enriba.

Pero esa non é a única historia que rodea este lugar. Tamén hai quen di que o pozo non ten fondo e que, por moitas veces que alguén intente medilo, nunca obtén a mesma profundidade.

A verdade é que, vendo as fotos, enténdese perfectamente por que acabaron nacendo lendas aquí. Unha fervenza duns trinta metros, rodeada de bosque e cun pozo escuro aos seus pés. É deses sitios que xa parecen gardar un segredo.

Agora só espero unha cousa: que, despois de ler esta entrada, a próxima vez que escoitedes falar da vella xigante do Pozo da Ferida tamén a imaxinedes coa cara de Ymir. Así non serei a única.